Simboliek van die Bondswapen

Die wapen van die Peter Henrich Henning Familiebond is in Goewermentskennisgewing no 1353 in Staatskoerant 9791 van 21 Junie 1985 amptelik kragtens die Heraldiekwet (Wet 18 van 1962) geregistreer en word as volg beskryf: Wapen: Gedeel rooi en blou, by die middelpunt 'n ossewawiel, daaroorheen 'n swaardlemkruis, alles silwer, vergesel in die skildhoof regs van 'n Afrikanerbul en in die skildvoet regs van 'n kasteel, en links, oor die arm van die kruis heen, van 'n klimmende leeu, alles goud; 'n silwer skildhoof.

Simboliek

• Die wawiel. Die eerste drie geslagte Hennings was almal Trekboere wat gedurende die laaste paar jaar van die 18e eeu en die eerste helfte van die 19e eeu die onbekende en ongerepte binneland van Suid-Afrika ingetrek het en meegehelp het om hierdie mooi land van ons mak te maak.
• Die vier swaardlemme. Tydens al die oorloë waar daar om die vryheid van ons land geveg is het die Hennings hul offers vir hul land gebring. Die swaardlemme in die vorm van 'n kruis simboliseer die Christenskap van die Hennings.
• Die bul. Die Hennings se liefde vir die natuur en die bodem word weerspieel in die feit dat bykans alle Hennings tot aan die begin van die twintigste eeu veeboere was.
• Die kasteel is geneem uit die wapen van Lippstadt en simboliseer die herkoms van Peter Henrich Henning.
• Die klimmende leeu simboliseer dapperheid en waagmoed. Die Hennings het bygedra om hierdie land mak te maak.

Last Updated Tuesday, June 21 2005 @ 12:31 AM